وزیراعظم کی زیر صدارت الیکٹرک وہیکلز کے استعمال سے متعلق اجلاس ہوا جس میں شہباز شریف نے وفاقی وزارت خزانہ اور سٹیٹ بینک سے مشاورت کی ہدایت کر دی۔ شہباز شریف نے نیشنل الیکٹرک وہیلز پالیسی نومبر میں مکمل کرنے اور ملک میں ای وہیکلز کی تیاری سے متعلق لائسنسز کے ضابطہ کار کو بہتر بنانے کی ہدایت کر دی۔اجلاس سے خطاب کرتے ہوئے وزیرِ اعظم شہباز شریف نے کہا ہے کہ ملک میں بجلی سے چلنے والی گاڑیوں کے فروغ کے لیے حکومت ترجیحی اقدامات کر رہی ہے۔انہوں نے کہا کہ بجلی سے چلنے والی گاڑیوں سے پٹرول اور ڈیزل کی درآمد کی مد میں زر مبادلہ کی بچت ہو گی اور گاڑیاں ماحول دوست بھی ہوں گی۔ شہبازشریف کا کہنا ہے کہ ای وہیکلز کی پالیسی سے متعلق تمام صوبوں، وفاقی اکائیوں اور سٹیک ہولڈرز سے مشاورت کی جائے، سرکاری سکولوں کے اچھی کارکردگی دکھانے والے طلباء میں الیکٹرک بائیکس تقسیم کی جائیں گی۔وزیرِ اعظم کا اپنے خطاب میں مزید کہنا تھا کہ آئندہ تمام وفاقی سرکاری اداروں کیلئے صرف الیکٹرک بائیکس کی خریداری کی جائے گی۔
شہبازشریف نے تمام وفاقی وزارتوں کو ہدایت جاری کرنے کے احکامات جاری کرتے ہوئے سی ڈی اے کو اسلام آباد میں الیکٹرک ٹرانسپورٹ سے متعلق پلان دینے کی ہدایت کر دی۔
