اسلام آباد: (ما نیٹر نگ ڈیسک )پیپلز پارٹی کے چیئرمین بلاول بھٹو زرداری اور امیر جماعت اسلامی حافظ نعیم الرحمان کی وفاقی دار الحکومت میں اہم ملاقات ہوئی، حافظ نعیم الرحمان نے بلاول بھٹو کو 7 اکتوبر کے احتجاج میں شرکت کی دعوت دیدی جس پر بلاول بھٹو نے احتجاج میں شرکت کی یقین دہانی کرا دی۔ملاقات کے بعد میڈیا سے گفتگو کرتے ہوئے حافظ نعیم الرحمان نے کہا کہ آج اسلام آباد کے بلاول ہاس میں حاضر ہوئے تھے، آج بلاول بھٹو اور ان کی پوری ٹیم سے ملاقات ہوئی۔حافظ نعیم الرحمان نے کہا کہ اس وقت دنیا میں بہت بڑا سوالیہ نشان پیدا ہوگیا ہے، سوالیہ نشان پیدا ہوا ہے کہ دنیا کسی بڑی جنگ کی طرف تو نہیں جا رہی، 7 اکتوبر کو غزہ میں جاری جنگ کو ایک سال ہوجائے گا، 30 ہزار سے زائد بچے اور خواتین شہید ہوچکے ہیںانہوں نے کہا کہ اسرائیل نے یو این او اجلاس کے دوران لبنان پر حملے کیے، ہمیں ایسی صورتحال پر فلسطینیوں کیلئے آواز اٹھانی اور اسرائیل کی مذمت کرنی چاہیے، ہمیں فلسطین کے مسلمانوں کی مدد کرنی چاہیے، ہم نے فیصلہ کیا ہے 7 اکتوبر کر فلسطینیوں کے ساتھ اظہار یکجہتی کریں گے۔امیر جماعت اسلامی نے کہا کہ مسئلہ فلسطین پر ہماری بلاول بھٹو سے بہت اچھی میٹنگ ہوئی، پیپلز پارٹی سے کہا ہے 7 اکتوبر کیلئے سب سے بھرپور اپیل کی جائے، 7 اکتوبر کو فلسطینیوں کیلئے باہر نکلیں، یہ سیاسی پوائنٹ سکورنگ کا مسئلہ نہیں، فلسطین کے مسلمانوں کا معاملہ ہے، چاہتے ہیں فلسطین کے مسئلے پر ہماری آواز ایک ہوجائے۔حافظ نعیم الرحمان نے کہا کہ سیاسی امور پا بات چیت کرنا فطری چیز ہے، ہمارا آج مسئلہ فلسطین پر اتفاق رائے ہوا، باقی تمام چیزوں پر بھی بات سب سے ہوسکتی ہے اور ہم کریں گے، ہم ان سے اپنا مقف منوانے کی بات کریں گے یہ اپنی دلیل دیں گے۔امیر جماعت اسلامی نے کہا کہ یہ نہیں ہوسکتا کہ نفرتیں پروان چڑھیں جس سے عوام میں تفریق پیدا ہوجائے، اپنا مقف سڑکوں پر بھی پیش کیا جانا چاہیے اور بات چیت میں بھی۔مسئلہ فلسطین پر جماعت اسلامی کا ساتھ دیں گے: بلاول بھٹو
چیئرمین پاکستان پیپلز پارٹی بلاول بھٹو نے کہا کہ آج جماعت اسلامی کا وفد اسلام آباد زرداری ہاس آیا، ہماری جماعت اسلامی کے وفد سے ملاقات ہوئی ہے، حافظ نعیم الرحمان کا تعلق ہمارے شہر کراچی سے ہے، نومنتخب امیر حافظ نعیم الرحمان کو مبارک باد پیش کرتا ہوں۔بلاول بھٹو نے کہا کہ اسرائیل کا ایجنڈا ہے کہ مسلمانوں کی نسل کشی کرنی ہے، اسرائیل نے مسلمانوں کی سرزمین پر قبضہ کرنے کیلئے نئی مہم 7 اکتوبر 2023 سے شروع کی، اب جنگ فلسطین، لبنان سے لے کر ہمارے ہمسایہ ملک ایران تک آگئی ہے، اس پوری سازش میں مسلمانوں، خاص طور پر غزہ کے لوگوں کا قتل عام کیا گیا۔چیئرمین پیپلز پارٹی نے کہا کہ بچوں اور خواتین کو شہید کیا گیا، پوری دنیا پر کوئی اثر نہیں ہو رہا، اسرائیل مظالم کو ایک سال مکمل ہو رہا ہے، موبائل فونز کو پیجر میں تبدیل کر کے حملے کیے جا رہے ہیں، سیاسی قیادت کو ایران میں شہید کیا جاتا ہے،
انہوں نے کہا کہ پاکستان کے اپنے اندرونی مسائل اپنی جگہ، پیپلز پارٹی اور جماعت میں نظریاتی طور پر اختلافات ہوں لیکن پیپلز پارٹی اور جماعت اسلامی مسئلہ فلسطین پر ایک پیج پر ہیں، پورے پاکستان کو مسئلہ فلسطین پر ایک پیج پر ہونا چاہیے، ہم جماعت اسلامی کی تعریف کرتے ہیں، سیاسی جماعتیں ایک دوسرے سے ہاتھ ملانے کو تیار نہیں ہوتیں، یہ پاکستانی سیاست میں ایک اچھی پیشرفت ہے۔بلاول بھٹو نے کہا کہ امیر جماعت اسلامی کو یقین دہانی کرائی ہے 7 اکتوبر کو مسئلہ فلسطین پر ان کا ضرور ساتھ دیں گے، تمام پارٹیاں 7 اکتوبر کو مل کر پوری دنیا کو پیغام بھیجیں کہ غزہ کے ساتھ کھڑے ہیں، مظلوم مسلمان فلسطین، لیبیا، ایران یا پھر یمن میں ہوں ہم ان کے ساتھ ہیں، ہمیں مسئلہ فلسطین جیسے مسئلے پر آپس کے اختلافات کو بھول جانا چاہیے۔
