پاکستان تحریک انصاف کے رہنما حماد اظہر نے کہا کہ عمران خان اپنی رہائی سے پہلے اسٹیبلشمنٹ سے کوئی بات چیت نہیں کرنا چاہتے۔
اپنے بیان میں حماد اظہر کا کہناتھاکہ بشریٰ بی بی اور پی ٹی آئی کے تمام قائدین کو بھی رہا کیا جائے، ہمارا مینڈیٹ بھی واپس کیا جائے، اس کے بغیر بانی پی ٹی آئی اسٹیبلشمنٹ سے مذاکرات نہیں کریں گے۔
انہوں نے کہا کہ عمران خان اپنی رہائی سے پہلے اسٹیبلشمنٹ سے کوئی بات چیت نہیں کرنا چاہتے۔
حماد اظہر نے اسٹیبلشمنٹ پر اخلاقیات اور اعتماد کے فقدان کا الزام بھی لگا دیا اور کہاکہ 9 مئی کو محض ایک بہانہ بنایا گیا ہے۔
ان کا کہناتھاکہ گیند بانی عمران خان کے ہاتھ میں ہے جبکہ اسٹیبلشمنٹ کے ہاتھ میں صرف ڈنڈا ہے جو اپنی افادیت کھو چکا ہے۔
خیال رہے کہ اس سے قبل شہریار آفریدی اور رؤف حسن نے کہا تھا کہ پی ٹی آئی اسٹیبلشمنٹ سے مذاکرات چاہتی ہے۔
